Yell Extreme Park

Հայաստանի ամենականաչ ու ամենագեղեցիկ շրջաններից մեկում՝ Տավուշում, Իջևան քաղաքի մոտ, Ենոքավան գյուղում, կանաչ լեռների ու կիրճերի մեջ տեղակայված է տարածաշրջանում այս մասշտաբի միակ էքստրիմ պարկը, որտեղ կարելի է հանգստանալ ամբողջ ընտանիքով, և յուրաքանչյուրը կգտնի իրեն հոգեհարազատ զբաղմունք՝ ելնելով իր ֆիզիկական հնարավորություններից ու ցանկություններից։ Էքստրիմ ատրակցիոնների աստղը, անկասկած, Զիփլայնն է։ Զիփլայն - թույլ է տալիս էքստրեմալ սպորտի սիրահարներին մի կետից մյուսը հասնել ճոպանի և սեփական մարմնի ձգողության ուժի օգնությամբ։ Yell Extreme Park-ն առաջարկում է զիփլայնի 5 ճոպանուղի՝ 135մ, 200մ, 268մ, 375մ և 750մ երկարությամբ և 200-300 մ բարձրությամբ։ Բոլոր 5 ճոպաններով թռչելու համար պահանջվում է մոտավորապես 1,5 ժամ, իսկ թռիչքի մի կետից մյուսը ոտքով հասնելու համար՝ 5-ից 20 րոպե։ Մեկ թռիչքի տևողությունը 30 վայրկյանից 2 րոպե է։ Թռիչքից առաջ անցկացվում է անվտանգության կանոնների վերաբերյալ 15 րոպե տևողությամբ ուսուցողական ինստրուկտաժ։ Վիա Ֆերատա ( հատուկ ժայռի վրա կառուցված երթուղի, որը թույլ է տալիս քայլել դրա ամբողջ երկարությամբ։ Երթուղու երկայնքով անցնում է պողպատե ճոպան, որը ժայռի մեջ ամրացված է յուրաքանչյուր 5-6 մետրը մեկ։ Այցելուն (ժայռամագլցողը) իրեն ամրացնում է ժայռին անվտանգության գոտիով՝ ապահովելով անվտանգությունը ողջ երթուղու ընթացքում։ Վիա Ֆերատայի երկարությունը 250 մ է։ Այստեղ կարող եք նաև ձիավարել, հատուկ սարքավորված Կամազով անցնել անմշակ ճանապարհներով, զբաղվել զորբինգով, փոքրիկ արշավ կատարել դեպի Լաստիվեր վայրը կամ պարզապես հանգստացնել մարմինն ու հոգին քաղաքային եռուզեռից՝ բնության գեղեցկության ու լռության գրկում։ Իսկ եթե սովածանաք, կա սրճարան։ Նրանց համար, ովքեր կցանկանան գիշերել այս վայրերում, անմիջական հարևանությամբ կան մի քանի էկո-հյուրանոցներ (Apaga Resort, Kanach Tun, Glamping), իսկ Ենոքավան գյուղում՝ հրաշալի տեսարաններով հյուրանոցներ՝ Լաստիվեր Ռեզորտ և Lost In Sky։